Þann 28. desember næstkomandi verða haldnir stórtónleikar til heiðurs Elly Vilhjálms í Eldborgarsal Hörpu og Katrín Halldóra flytur allar helstu dægurlagaperlur þessarar dáðu söngkonu ásamt góðum gestum.
Ekki eru þó allir sáttir með hvernig tónleikarnir hafa verið kynntir. Þórarinn Leifsson, rithöfundur og teiknari, heldur því fram að aðstandendur tónleikanna hafi notast við gervigreindarmynd af söngkonunni.
„Hérna er mjög gott dæmi um vonda AI hönnun sem á að auglýsa atburð í Reykjavík. Vinstra megin er kona með sál. Hægra megin er búið að sykurhúða. Ellý er ekki lengur Ellý – hún er eitthvað allt annað,“ skrifar rithöfundurinn og birtir mynd.
Hann er ekki einn á þessari skoðun. „Þetta er ekki sama konan, auk þess sem ai-ið er ótrúlega lélegt,“ segir listakonan Ragnhildur Jóhanns.
„Hræðileg,“ segir rithöfundurinn og teiknarinn Bergrún Íris Sævarsdóttir. Egill Helgason tekur undir og kallar þetta ömurlegt.
„Líklega mun fólk bráðlega vilja líkjast gervigreindarteikningu. Og þá vilja fæstir hafa sál. Hún er svo ófullkomin og púkó,“ skrifar fjölmiðlamaðurinn Gunnar Smári Egilsson um málið
