Lögreglan á höfuðborgarsvæðinu hafði afskipti af nokkrum málum í umdæminu samkvæmt dagbók embættisins, meðal annars vegna ósamvinnuþýðs farþega í strætisvagni, þjófnaðar, umferðaróhapps og hávaðakvartana.

Strætóbílstjóri óskaði eftir aðstoð lögreglu vegna farþega sem neitaði að yfirgefa vagninn. Þegar lögregla kom á vettvang neitaði viðkomandi að gefa upp nafn sitt og var því handtekinn. Eftir að hann var fluttur á lögreglustöð gaf hann upp rétt nafn sitt og var í kjölfarið látinn laus.

Þá var lögreglu tilkynnt um aðila sem öryggisverðir höfðu í haldi í Hjarta Hafnarfjarðar. Viðkomandi var handtekinn og fluttur á lögreglustöð þar sem tekin var af honum skýrsla. Að henni lokinni var honum sleppt.

Lögregla var einnig kölluð að heimili þar sem kvartað hafði verið undan hávaða vegna samkvæmis. Húsráðanda var gert að lækka tónlistina og ró komst á svæðið. Síðar sama dag barst önnur tilkynning um tónlistarhávaða frá heimahúsi og var húsráðandi einnig beðinn um að draga úr hávaðanum.

Þá var óskað eftir aðstoð lögreglu og sjúkraflutningamanna vegna umferðaróhapps þar sem bifreið hafði verið ekið á gám. Ökumaður hlaut minniháttar meiðsli og var fluttur á bráðamóttöku til frekari aðhlynningar.

Að lokum barst tilkynning um þjófnað úr matvöruverslun. Lögregla fór á vettvang og málið er til meðferðar.