Hinn vinsæli en umdeildi barnabókaútgafandi Huginn Þór Grétarsson hefur verið tekinn til gjaldþrotaskipta en greint er frá þessu í Lögbirtingablaðinu.

Huginn hefur verið mikið í sviðljósinu undanfarin ár vegna bókaútgáfu og dómsmála.

Óðinsauga, sem Huginn stýrir, hefur gefið út mörg hundrað barnabækur og hafa margar þeirra notið mikilla vinsælda. Hart var deilt um útgáfu á bókinni Dimmalimm en útgáfufélagið Óðinsauga gaf út uppfærða útgáfu með nýjum myndum árið 2023. Gekk deilan svo langt að Myndhöfundasjóður taldi verkið ganga nærri sæmdarrétti Guðmundar Thorsteinssonar sem og réttmætum viðskiptaháttum. Þá voru afkomendur Guðmundar andvígir útgáfunni. Verkið hafði fallið úr höfundavernd og þess vegna gat Óðinsauga gefið út nýja útgáfu.

Sagður beita konur ofbeldi

Þá hefur Huginn verið ítrekað ásakaður á internetinu um að beita konur ofbeldi og hefur hann farið í meiðyrðamál við fólk vegna þess. Sem dæmi lét Elías Halldór Ágústsson eftirfarandi ummæli falla um Hugin:

„Huginn Thor Grétarsson, veistu, ég hef talað við margar konur sem hafa hitt þig og þær segja allar það sama, að þú sért augljóslega ofbeldismaður, því þú getir ekki séð konu án þess að sýna henni ógnandi tilburði.“

„… ég hef mínar upplýsingar frá fólki sem hefur enga ástæðu til að gera út sögur um hann. Það er ekki fólk sem er  í mínum femínistagrúppum, ekki einu sinni dóttir mín sem hefur verið þýðandi og túlkur fyrir finnska fyrrverandi eiginkonu; hún hefur ekki sagt orð um hann, nema að það kemur á hana viðbjóðsgretta þegar hún heyrir nafn hans nefnt. Ég hef mínar upplýsingar frá fólki sem hitti hann af tilviljun og þótti hann  minnisstæður einmitt fyrir þetta. Kannski myndirðu þekkja hann fyrir allt annan mann værir þú kona.“

„Huginn Thor Grétarsson, það eru engar dylgjur, það er algjörlega klárt mál að þú ert ofbeldismaður.“

Huginn vann málið fyrir Héraðsdómi en tapaði í Landsrétti.