Icelandair hefur tilkynnt breytingar á Saga Premium-fargjaldi félagsins sem fela í sér að minna verður innifalið í fargjaldinu en áður. Breytingarnar taka gildi frá og með deginum í dag og eru sagðar fyrsta skrefið í umfangsmeiri breytingum á þjónustuframboði flugfélagsins.

Með breytingunum mun aðeins ein innrituð taska, allt að 32 kíló að þyngd, fylgja Saga Premium-fargjaldi. Hingað til hafa tvær slíkar töskur verið innifaldar.

Þá verður einnig breyting á sætavali farþega sem ferðast á Saga Premium. Framvegis verður tekið sérstakt gjald fyrir að velja sæti fyrirfram. Þeir farþegar sem kjósa að greiða ekki fyrir sætaval fá sæti úthlutað án endurgjalds á flugvellinum.

Breytingarnar ná ekki til Saga Premium Flex-fargjaldsins, sem helst óbreytt. Þar verða áfram innifaldar tvær innritaðar töskur og tvær handfarangurstöskur.

Icelandair segir breytingarnar vera fyrsta skrefið í stærri endurskoðun á þjónustuframboði félagsins. Fleiri breytingar og nýjungar eru fyrirhugaðar á næsta ári.