Norðurlandamótið í eldsmíði fór fram dagana 11.–14. júní í Tidaholm í Svíþjóð. Mótið var haldið í sögulegri smiðju gömlu Vulcan- eldspýtnaverksmiðjunnar, sem reist var árið 1871 og var í notkun í nær heila öld.
Keppendur frá Íslandi, Danmörku, Finnlandi, Noregi og Svíþjóð tóku þátt í mótinu. Keppt var í þremur einstaklingsflokkum: opnum flokki, sveinaflokki og meistaraflokki. Auk þess fór fram opin liðakeppni þar sem alls sex lið tóku þátt, sum þeirra skipuð keppendum frá fleiri en einu landi.
Íslendingar náðu góðum árangri á mótinu. Þröstur Sigmundsson sigraði í opnum flokki og vann þar með gullverðlaun fyrir Ísland.
Í sveinaflokki hafnaði Guðmundur Sigurðsson í þriðja sæti. Þar sigraði Svíinn Erik Bernhardsson, en Norðmaðurinn Sondre Strömseng varð í öðru sæti.
Í meistaraflokki sigraði Finninn Sami Ryhänen. Magnus Nilsson frá Svíþjóð varð annar og Beate Stormo frá Íslandi vann til bronsverðlauna.
Opnu liðakeppnina vann lið frá Danmörku, en keppnin var ekki bundin við landslið þar sem nokkur lið voru skipuð keppendum frá mismunandi löndum.
Árangur Íslendinga á mótinu var því glæsilegur með ein gullverðlaun og tvenn bronsverðlaun. Mótið þótti afar vel heppnað og sameinaði keppni, sýningar, fyrirlestra og félagslíf eldsmiða alls staðar af Norðurlöndum.
Norðurlandamót í eldsmíði eru haldin annað hvert ár og fara á milli Norðurlandanna. Næsta mót verður haldið í Noregi árið 2028.
