Lögreglan á höfuðborgarsvæðinu ítrekar að foreldrum og forsjáraðilum standi til boða aðstoð við að fjarlægja svokallaða VPN-stillingu úr símum barna og ungmenna. Yfir 300 ungmenni eru sögð nota stillinguna, sem getur gert ókunnugum kleift að lesa og breyta netumferð þeirra.
Málið tengist rannsókn lögreglu á sölu falsaðra rafrænna skilríkja til ungmenna. Samkvæmt upplýsingum lögreglu keyptu ungmennin aðgang að vefsíðu eða snjallsímaforriti fyrir Apple iPhone.
Í tengslum við starfsemina var jafnframt boðin til sölu sérstök VPN-stilling. Lögregla hefur varað við því að notkun hennar geti haft alvarlega áhættu í för með sér þar sem utanaðkomandi aðilar geti fengið aðgang að netumferð notenda og jafnvel breytt henni.
Vegna málsins býður lögreglan foreldrum og forsjáraðilum aðstoð við að fjarlægja stillinguna úr tækjum ungmennanna.
Aðstoðin verður í boði í dag, fimmtudaginn 15. október, frá klukkan 11 til 12 á lögreglustöðinni við Hverfisgötu 113 í Reykjavík. Gengið er inn um inngang stöðvarinnar sem er nær Snorrabraut.
