Sex líbanskir sjúkraflutningamenn létust í tveimur loftárásum Ísraels á suðurhluta Líbanons á innan við sólarhring, samkvæmt heilbrigðisráðuneyti Líbanons sem fordæmdi árásirnar og sagði þær brjóta gegn alþjóðalögum.
Samkvæmt ráðuneytinu féllu fjórir sjúkraflutningamenn úr Islamic Health Association í loftárás á bæinn Hanaway aðfaranótt föstudags.
Síðar á föstudagsmorgun létust tveir sjúkraflutningamenn til viðbótar úr Al-Rissala Scouts Association í árás á Deir Qanoun En-Nahr.
Ísraelsher sagði árásina í Hanaway hafa beinst að innviðum Hezbollah þar sem liðsmenn samtakanna hefðu verið staddir.
Varðandi árásina í Deir Qanoun En-Nahr sagði herinn að tveir liðsmenn Hezbollah á mótorhjólum hefðu verið skotmörk árásarinnar.
Í báðum tilvikum sagðist herinn rannsaka fregnir um að óbreyttir borgarar sem ekki hefðu verið skotmörk hefðu einnig særst eða látist. Þá sagði herinn að íbúum hefði verið skipað að yfirgefa svæðin til að draga úr hættu á mannfalli meðal almennra borgara.
Heilbrigðisráðuneyti Líbanons birti myndskeið sem það sagði sýna atburðinn í Deir Qanoun En-Nahr. Þar sjást tveir menn í gulum vestum hlúa að særðum einstaklingi við vegkant þegar sjúkrabíll nálgast. Skömmu síðar sést ljósblossi og heyrist sprenging áður en mennirnir liggja hreyfingarlausir á jörðinni.
Fréttastofan Reuters sagðist hafa staðfest staðsetningu myndbandsins út frá byggingum, trjám og vegakerfi á svæðinu.
Samkvæmt heilbrigðisráðuneytinu létust alls sex manns í árásinni á Deir Qanoun En-Nahr, þar á meðal sjúkraflutningamennirnir tveir og sýrlenskt barn.
Bærinn varð einnig fyrir loftárás fyrr í vikunni þar sem 14 manns létust, í mannskæðustu stöku árás síðan brothætt vopnahlé var kynnt í síðasta mánuði.
Yfir 3.100 manns hafa fallið í Líbanon síðan 2. mars þegar Hezbollah hóf eldflaugaárásir á Ísrael í upphafi nýrra átaka ríkjanna.
Samkvæmt tölum frá heilbrigðisráðuneytinu eru meðal hinna látnu 123 sjúkraflutningamenn, yfir 210 börn og nærri 300 konur.
Alþjóðleg mannúðarlög veita viðbragðsaðilum, heilbrigðisstarfsfólki og borgaralegum innviðum sérstaka vernd í stríðsátökum.
Alþjóðaheilbrigðismálastofnunin segir nokkur sjúkrahús í suðurhluta Líbanons hafa skemmst eða lagst af vegna árása Ísraela.
Á fimmtudag varð loftárás nærri Tebnine-sjúkrahússins til þess að allar þrjár hæðir byggingarinnar skemmdust, þar á meðal bráðamóttaka, gjörgæsla, skurðdeild og sjúkrabílar sem stóðu fyrir utan sjúkrahúsið.
