Jón Atli Benediktsson, prófessor í rafmagns- og tölvuverkfræði og fyrrverandi rektor Háskóla Íslands, hefur hlotið Fawwaz Ulaby Distinguished Achievement Award, ein virtustu verðlaun alþjóðlegu samtakanna IEEE Geoscience and Remote Sensing Society en Háskóli Ísland greinir frá þessu á vefsíðu sinni.
Jón Atli tók við verðlaununum á alþjóðlegu fjarkönnunarráðstefnunni IGARSS 2026 í Washington DC í Bandaríkjunum fyrr í vikunni. Verðlaunin eru veitt árlega einstaklingi sem hefur á ferli sínum lagt framúrskarandi skerf til þróunar tækni á sviði fjarkönnunar.
Við afhendinguna kom fram að Jón Atli hlyti viðurkenninguna fyrir einstakt framlag til framfara í mynstur- og myndgreiningu og gagnabræðslu innan fjarkönnunar.
Fjarkönnun felur meðal annars í sér söfnun og úrvinnslu stafrænna mynda frá gervitunglum, flugvélum og drónum. Aðferðirnar má nýta til að fylgjast með breytingum á náttúru og umhverfi, meðal annars gróðri, jöklum og hafi, auk þess að greina framvindu eldsumbrota.
Jón Atli hefur hlotið fjölmargar alþjóðlegar viðurkenningar fyrir vísindastörf sín. Á síðasta ári var hann kjörinn í Bandarísku verkfræðiakademíuna, National Academy of Engineering. Árið 2020 hlaut hann jafnframt viðurkenningu GRSS fyrir framlag sitt til menntunar á sviði fjarkönnunar. Þá hefur hann átta ár í röð verið á lista Clarivate Analytics yfir áhrifamestu vísindamenn heims.
