Umboðsmaður Alþingis telur að læknir geti kært ákvörðun framhaldsmenntunarráðs lækninga um mat á starfstíma hans til sérnáms í heimilislækningum til heilbrigðisráðuneytisins. Umboðsmaður telur jafnframt að ákvæði reglugerðar sem kveður á um að slíkar ákvarðanir séu endanlegar á stjórnsýslustigi eigi sér ekki stoð í lögum.

Málið á rætur að rekja til ákvörðunar framhaldsmenntunarráðs frá maí 2025. Læknirinn hafði óskað eftir að 16 mánaða starf hans á heilsugæslustöð yrði metið til námstíma í sérnámi hans. Ráðið féllst á að meta sex mánuði af tímabilinu.

Læknirinn kvartaði í kjölfarið til umboðsmanns. Heilbrigðisráðuneytið taldi að ákvarðanir framhaldsmenntunarráðs væru ekki stjórnvaldsákvarðanir og því ekki kæranlegar til ráðuneytisins.

Umboðsmaður komst að annarri niðurstöðu. Að mati embættisins er framhaldsmenntunarráð stjórnvald og ákvörðun þess í málinu stjórnvaldsákvörðun, enda hafi hún haft bindandi áhrif á námstíma læknisins og þar með mögulega námslok, launakjör og faglega stöðu hans.

Umboðsmaður telur því að lækninum sé heimilt að kæra niðurstöðuna til heilbrigðisráðuneytisins. Jafnframt er mælst til þess að ráðuneytið endurskoði reglugerðarákvæðið sem kveður á um að ákvarðanir ráðsins séu endanlegar á stjórnsýslustigi.

Álitið var birta á heimasíðu Umboðsmanns Alþingis þann 15. september.