Flugvirkjar hjá Icelandair hafa samþykkt boðun ótímabundinnar vinnustöðvunar með 88,3 prósentum greiddra atkvæða. Verkfallið hefst að óbreyttu klukkan 00:01 miðvikudaginn 23. september.

Flugvirkjafélag Íslands hefur tilkynnt Icelandair, Samtökum atvinnulífsins og ríkissáttasemjara um niðurstöðu kosningarinnar.

Icelandair segir að náist ekki samkomulag fyrir þann tíma megi búast við röskun á flugrekstri og breytingum á flugáætlun félagsins.

Kjarasamningar flugvirkja runnu út um síðustu áramót og hafa viðræður staðið yfir frá nóvember 2025. Deilunni var vísað til ríkissáttasemjara í febrúar en lítið hefur miðað í samningaviðræðum.