Guðmundur Felix Grétarsson hefur birt myndband þar sem hann sýnir hvernig nef hans lítur út eftir aðgerð sem hann gekkst undir í ágúst vegna krabbameins.

Guðmundur Felix, sem gekkst undir handleggjaágræðslu árið 2021, greindist með krabbamein sem þurfti að fjarlægja. Upphaflega leit út fyrir að fjarlægja þyrfti nef hans, en hann leitaði annars álits hjá læknateymi í Normandí í Frakklandi.

„Það átti að taka af mér nefið. Ég fann aðra lækna sem gátu gert þetta svona,“ segir hann.

Samkvæmt Guðmundi Felix tókst að fjarlægja krabbameinið að öllu leyti. Hann þarf þó að gangast undir geislameðferð, sem á að hefjast í október, áður en hægt verður að hefja enduruppbyggingu nefsins.

Sú vinna getur hafist um ári síðar. Á meðan þarf Guðmundur Felix að vera með sérstakt plast í nefinu í að minnsta kosti sjö mánuði til að koma í veg fyrir að það grói saman.

„Þannig er staðan, ég er með nefið mitt,“ segir hann.