Einn lést og 20 slösuðust þegar farþegalest rakst á steypubíl og fór út af sporinu í austurhluta Póllands í dag. Um 120 farþegar voru um borð í lestinni þegar slysið varð.

Slysið varð í Sokolniki Suche, um 100 kílómetra suður af Varsjá. Karolina Jaworska, upplýsingafulltrúi lögreglunnar í Mazovíu, staðfestir við AFP að einn hafi látist í slysinu. Talið er að um farþega lestarinnar hafi verið að ræða.

Pólska járnbrautafélagið PKP Intercity greinir frá því að 20 manns hafi slasast, þar af fjórir alvarlega.

Við áreksturinn fóru eimreið lestarinnar og sex vagnar út af sporinu. Myndir frá vettvangi sýna eimreiðina og nokkra lestarvagna utan teinanna.

Fjölmennt lið viðbragðsaðila er á vettvangi. Fulltrúar járnbrautafélagsins og saksóknarar hafa einnig komið á staðinn og vinna nú að rannsókn á tildrögum slyssins. Ekki liggur fyrir hvað varð til þess að lestin og steypubíllinn rákust saman.