Lögreglan á höfuðborgarsvæðinu tók nýverið þátt í umfangsmikilli alþjóðlegri lögregluaðgerð sem beindist að netþjónustu sem gekk undir nafninu AudiA6. Þetta kemur fram í tilkynningu frá lögreglu.

Samkvæmt tilkynningunni var þjónustan nýtt til mjög umfangsmikils peningaþvættis fyrir skipulagða brotahópa víða um heim. Rannsókn málsins stóð yfir í langan tíma og náði til fjölmargra landa.

Á Íslandi vann Lögreglan á höfuðborgarsvæðinu að rannsókninni í samstarfi við embætti ríkissaksóknara. Þá naut lögregla einnig aðstoðar íslensks hýsingarfyrirtækis, en íslenskir innviðir höfðu verið misnotaðir af þeim sem stóðu að starfseminni.

Tveir fulltrúar bandarískrar löggæslustofnunar komu hingað til lands vegna rannsóknarinnar. Enginn var þó handtekinn á Íslandi í tengslum við málið.