Lögreglan hafði í nógu að snúast í nótt og í gærkvöldi og sinnti fjölbreyttum verkefnum, þar á meðal útköllum vegna líkamsárása, slagsmála, umferðarslyss og fíkniefnatengdra brota.

Óskað var eftir aðstoð lögreglu vegna hnupls úr verslun og var málið tekið til meðferðar. Þá var einn aðili handtekinn grunaður um fíkniefnabrot. Sá reyndist jafnframt vera í broti á skilyrðum reynslulausnar og neitaði að segja til nafns þegar þess var krafist af lögreglu.

Alls voru nokkrir ökumenn stöðvaðir vegna gruns um akstur undir áhrifum vímuefna. Þrír voru handteknir af þeim sökum. Þá var einn ökumaður sektaður fyrir að aka sviptur ökurétti og tveir ökumenn voru handteknir grunaðir um ölvunarakstur.

Lögreglu barst einnig tilkynning um líkamsárás í fjölbýlishúsi og síðar um líkamsárás við bar en málin eru ótengd. Þá var óskað eftir aðstoð vegna slagsmála við samkomustað.

Tilkynnt var um rúðubrot. Einnig var óskað eftir aðstoð vegna umferðarslyss. Engin slys urðu á fólki.