Í dagbók lögreglu frá því í nótt er greint frá því að maður í líkamsræktarstöð hafi verið að hóta öðrum. Þegar lögreglan mætti á svæðið sagði vitni að mennirnir hefðu slegist og var einum vísað út úr ræktinni.

Þá var tilkynnt um dreng sem var sakaður um að brjóta rúðu í fjölbýli en hann var farinn þegar lögreglan mætti.

Ökumaður var stöðvaður í umferðinni með filmur í rúðum og á glitaugum. Sá á yfir höfði sér sekt.

Ökumaður var stöðvaður í umferðinni en tilkynnt hafði verið um aksturslagið hans. Hann reyndist undir áhrifum vímuefna og án ökuréttinda en var látinn laus að blóðsýnatöku lokinni.

Lögreglan fékk tilkynningu um hnupl í matvörubúð og var það afgreitt á vettvangi að sögn lögreglu.