Á morgun, 19. júní, verður kvenréttindadagsins minnst með hátíðlegri athöfn í Hólavallagarði en 111 ár eru síðan konur fengu kosningarétt. Blómsveigur verður lagður að leiði Bríetar Bjarnhéðinsdóttur og mun Björg Magnúsdóttir forseti borgarstjórnar heiðra minningu Bríetar, sem var brautryðjandi í jafnréttisbaráttu og stofnandi Kvenréttindafélags Íslands.
Dagskráin hefst klukkan 11:00 með tónlistarflutningi Sigrúnar Erlu Grétarsdóttur og Vignis Þórs Stefánssonar. Í kjölfarið munu tvær stúlkur, þær Nína Melkorka Ólafsdóttir og Jóný Helgadóttir, bera blómakrans að leiðinu áður en forseti borgarstjórnar flytur ávarp sitt. Athöfninni lýkur svo með frekari tónlistarflutningi klukkan 11:30.
Bríet Bjarnhéðinsdóttir, sem lést árið 1940, átti ríkan þátt í að koma á réttarbótum konum til handa og efla íslenskt lýðræðissamfélag. Hún stofnaði Kvenréttindafélag Íslands árið 1907 og gegndi formennsku þar allt til ársins 1928, þar sem barist var fyrir fullu stjórnmálajafnrétti, kosningarétti og atvinnuréttindum kvenna til jafns við karla.
Bríet var jafnframt ein af fjórum konum sem náðu sögulegu kjöri í bæjarstjórn Reykjavíkur árið 1908, en það var fyrsta sérframboð kvenna hér á landi. Í starfi sínu sem bæjarfulltrúi lét hún til sín taka í mikilvægum velferðarmálum, þar á meðal með innleiðingu skólamatargjafa fyrir vannærð börn, sundkennslu fyrir bæði kyn og uppbyggingu leikvalla í borginni.
Dagskráin á kvenréttindadaginn 19. júní 2026
Björg Magnúsdóttir, forseti borgarstjórnar, leggur blómsveig frá Reykvíkingum að leiði Bríetar Bjarnhéðinsdóttur, fyrrverandi borgarfulltrúa og kvenréttindakonu, í Hólavallagarði í tilefni kvenréttindadagsins 19. júní 2026.
- 11.00 – Tónlist, Sigrún Erla Grétarsdóttir söngur og Vignir Þór Stefánsson spilar undir á hljómborð
- 11.05 - Tvær stúlkur, Nína Melkorka Ólafsdóttir og Jóný Helgadóttir, bera blómakrans að leiði Bríetar Bjarnhéðinsdóttur og hann lagður á leiðið.
- 11.10 - Ávarp Bjargar Magnúsdóttur, forseta borgarstjórnar.
- 11.20 – Tónlist, Sigrún Erla Grétarsdóttir, söngur og Vignir Þór Stefánsson spilar undir á hljómborð
- 11.30 - Dagskrá lokið
