Margir kannast við að verða bitnir af moskítóflugum á meðan aðrir í nágrenninu sleppa nær alveg. Nýjar rannsóknir benda til þess að þetta sé ekki tilviljun heldur ráðist af flóknu samspili lykta, líkamsvarma og annarra efna sem mannslíkaminn gefur frá sér.
Frédéric Simard skordýrafræðingur segir að moskítóflugur laðist svo sannarlega að sumum einstaklingum en öðrum. Hann bendir þó á að fólk sé ekki alltaf jafn aðlaðandi fyrir flugurnar og að ýmsir þættir geti haft áhrif á aðdráttaraflið.
Kvenkyns moskítóflugur, sem eru þær einu sem bíta, nota mjög næm skynfæri til að greina koltvísýring sem menn anda frá sér. Þegar þær nálgast fórnarlamb sitt taka þær einnig eftir líkamslykt, hita og raka frá húðinni.
Vísindamenn hafa lengi rannsakað hvaða þættir ráða mestu um val flugnanna. Samkvæmt nýlegri rannsókn fundust 27 lyktarefni sem moskítóflugur nema sérstaklega vel. Eitt þeirra, svokallað 1-octen-3-ol eða „sveppaalkóhól“, virtist skipta miklu máli. Konur sem framleiddu meira af efninu reyndust vinsælli skotmörk flugnanna.
Aftur á móti segja sérfræðingar að engar haldbærar vísindalegar sannanir séu fyrir því að ákveðnir blóðflokkar, eða litur húðar, augna eða hárs, hafi áhrif á hversu mikið fólk er bitið.
Rannsóknir benda einnig til þess að áfengisneysla geti aukið aðdráttarafl manna fyrir moskítóflugur. Bjórdrykkja hækkar líkamshita, eykur útöndun koltvísýrings og breytir líkamslykt á þann hátt að flugurnar sækja frekar í viðkomandi.
Sérfræðingar ráðleggja fólki að klæðast víðum fatnaði sem hylur húðina, nota flugnafælu og draga úr áfengisneyslu til að minnka líkur á biti, sérstaklega þar sem útbreiðsla moskítóflugna eykst vegna loftslagsbreytinga.
