Samtökin No Borders Iceland, Réttur barna á flótta og aðstandendur Oscars Anders Bocanegra Florez, 17 ára drengs frá Kólumbíu, boða til mótmæla á Austurvelli klukkan 15:00 í dag vegna brottvísunar Oscars, sem hefur nú verið staðfest.
Kærunefnd útlendingamála úrskurðaði á dögunum að Oscari Anders Bocanegra Florez, verði sendur aftur til heimalands síns, Kólombíu en hinn 17. ára drengur vill ekki fara en hann hefur myndað góð tengsl hér á landi, á sína fósturfjölskyldu hér og óttast um líf sitt, verði hann sendur aftur til Kólumbíu.
Vegna úrskurðarins hefur verið blásið til mótmæla sem hefjast klukkan 15:00 í dag á Austurvelli. Fluttar verða ræður á fundinum en prestur þjóðkirkjunnar, Þór Benediktsson, aðstandendur Oscars og Askur Hrafn Hannesson, munu fara með þær.
Í viðburðarlýsingu mótmælanna stendur meðal annars eftirfarandi texti:
„ÚTLENDINGASTOFNUN VIRÐIR EKKI NIÐURSTÖÐU BARNAVERNDAR:
Barnavernd hefur krafist þess að brottvísun Oscar verði stöðvuð, Útlendingastofnun og Kærunefnd útlendingamála hafa ekki virt þá niðurstöðu og til stendur að brottvísa Oscar í byrjun júní. Hingað til hafa dómsmálaráðherra og barnamálaráðherra ítrekað neitað að beita sér í málinu. Því verður að breyta! Höfnum ofbeldi Útlendingastofnunar.
Virðum Barnasáttmálann! Krefjumst mannúðar.
EKKI Í OKKAR NAFNI.“
