Óvæntur og merkilegur fundur kom í ljós á öðrum degi fornleifauppgraftar á Hafnabúðum á Skaga þegar fornleifafræðingar fundu mynt sem talin er vera frá valdatíð Ólafs kyrra Noregskonungs, sem ríkti á árunum 1067 til 1093.
Frá þessu greinir Byggðasafn Skagfirðinga á Facebook. Þar kemur fram að nú sé hafið fjórða og síðasta rannsóknarárið á verbúðaminjum á jörðinni Höfnum í Skagafirði, þar sem verið er að rannsaka elstu mannvistarleifarnar frá fyrri hluta 12. aldar.
Að sögn safnsins er þetta fyrsta myntin sem finnst við uppgröftinn í Höfnum og, eftir því sem best er vitað, jafnframt fyrsta myntin sem finnst í íslenskri verstöð frá þessum tíma.
Uppgröfturinn er samstarfsverkefni Byggðasafns Skagfirðinga, Minjastofnunar Íslands, Arkeologisk museum við Háskólann í Stavanger, Háskóla Íslands á Hólum og UMass Boston í Bandaríkjunum.
Verstöð var rekin í Höfnum frá 11. öld og fram á þá 18. og standa rannsóknir nú yfir á elstu minjunum. Uppgröfturinn heldur áfram fram yfir verslunarmannahelgi og verður hægt að fylgjast með framvindu hans á miðlum Byggðasafns Skagfirðinga.
