Lögreglufélag Vestfjarða krefst þess að ríkið grípi tafarlaust til aðgerða vegna húsnæðis lögreglunnar á Ísafirði. Félagið segir núverandi aðstöðu ekki uppfylla kröfur um viðunandi vinnuumhverfi og telur að mygla og rakaskemmdir í húsnæðinu geti ógnað heilsu starfsfólks.
Þetta kemur fram í ályktun félagsfundar Lögreglufélags Vestfjarða um húsnæðismál lögreglunnar á Ísafirði.
Félagið segir að áform séu uppi um endurbyggingu húsnæðisins en telur að slík framkvæmd sé ekki skynsamleg lausn. Kostnaður við endurbætur geti að lokum orðið meiri en kostnaður við byggingu nýs húsnæðis. Jafnframt sé ólíklegt að fyrirhugaðar breytingar uppfylli þarfir lögreglunnar til framtíðar.
Félagið leggur því til að núverandi húsnæði verði látið af hendi og nýtt og stærra húsnæði byggt fyrir starfsemi lögreglunnar.
Í ályktuninni kemur einnig fram að Landssamband lögreglumanna hafi sent frá sér ályktun um ástand húsnæðisins um miðjan mars en að mati félagsins hafi ekki verið brugðist við henni.
Þá gagnrýnir Lögreglufélag Vestfjarða Vinnueftirlit ríkisins og telur stofnunina ekki hafa staðið við skyldur sínar við að tryggja öryggi starfsmanna. Vísað er til laga um vinnuvernd, aðbúnað, hollustuhætti og öryggi á vinnustöðum.
Félagið skorar á ríkið, hlutaðeigandi ráðherra og aðra ábyrgðaraðila að bregðast tafarlaust við og tryggja lögreglumönnum á Ísafirði öruggt og heilbrigt starfsumhverfi.
„Núverandi aðbúnaður og starfsaðstaða lögreglumanna á Ísafirði er með öllu óboðlegt ástand,“ segir í ályktuninni.
