Íbúum á Borgarfirði eystra hefur verið ráðlagt að sjóða allt vatn sem ætlað er til neyslu eftir að E. coli-gerlar greindust í sýnum úr vatnsveitunni í síðustu viku. Unnið er að úrbótum á veitunni til að draga úr hættu á sambærilegri mengun í framtíðinni en Austurfréttgreinir frá þessu.
Í tilkynningu frá HEF veitum kemur fram að íbúar eigi að sjóða vatn áður en það er drukkið eða notað við matargerð. Vatnið megi hins vegar áfram nota til annarra þarfa, meðal annars til baða. Magn gerla sem greindist sé innan þeirra viðmiðunarmarka sem gilda um baðvatn í náttúrunni.
Ekki liggur fyrir með vissu hvað olli menguninni. Talið er líklegt að gerlar hafi borist úr náttúrunni í brunna vatnsveitunnar. Sambærileg mengun hefur komið upp nokkrum sinnum á undanförnum árum.
Vegna þessa hefur verið unnið að uppsetningu gegnumlýsingartækis við vatnsveituna sem ætlað er að eyða gerlum úr vatninu og bæta öryggi neysluvatns til framtíðar. Ekki liggur fyrir hvort hægt verði að taka búnaðinn í notkun í þessari viku. Frekari sýnataka úr vatnsveitunni er fyrirhuguð á næstu dögum.
Á sama tíma glíma íbúar í hluta Fellabæjar við kaldavatnsleysi. HEF veitur greindu frá því í morgun að bilun hefði komið upp í stofnlögn með þeim afleiðingum að kaldavatnslaust væri á hluta svæðisins.
Viðgerð stendur yfir og er unnið að því að koma kaldavatnsveitunni aftur í eðlilegt horf.
