Gamanleikarinn og uppistandarinn James Acaster varð að sögn „sýnilega stressaður“ við tökur á nýrri þáttaröð af raunveruleikaþættinum Celebrity Traitors og þurfti framleiðslan að gera hlé á upptökum til að hann gæti róað sig.
The Traitors hefur löngum verið spennuþrungið sjónvarpsefni fyrir áhorfendur og virðist álagið ekki síður mikið á þá sem taka þátt í leiknum.
Acaster er meðal þátttakenda í annarri þáttaröð Celebrity Traitors, ásamt meðal annars Maya Jama, Miröndu Hart, Ross Kemp og James Blunt. Claudia Winkleman stýrir þættinum sem snýst um blekkingar, svik og baktjaldamakk.
Heimildarmaður sem þekkir til framleiðslunnar segir við The Sun að sálrænt álag hafi á einum tímapunkti reynst Acaster mikið. Samkvæmt heimildarmanninum varð hann mjög kvíðinn og fékk það sem lýst er sem kvíða-kasti við tökur í Ardross-kastala í Skotlandi.
„Þátturinn er ótrúlega ákafur og í einni tiltekinni senu í kastalanum varð James mjög kvíðinn og skelfingu lostinn,“ sagði heimildarmaðurinn.
Aðrir þátttakendur hafi þá stigið fram og óskað eftir því að hætt yrði að taka upp svo Acaster gæti róað sig. Framleiðsluteymið hafi verið sammála um að gera hlé.
„Allir fylgjast með hver öðrum og það er mikil samheldni,“ sagði heimildarmaðurinn. „Það var gott fyrir James að fá smá hvíld og öllum fannst það vera það rétta í stöðunni.“
Hléið hafði að sögn engin áhrif á framvindu leiksins en sýndi hins vegar hversu mikið þátttakendur voru niðursokknir í keppnina.
Talsmaður BBC sagði við fréttamiðilinn Metro að The Traitors væri „einstakur og mjög krefjandi leikur“ og að þátttaka gæti stundum verið erfið.
„Forgangsverkefni okkar er ávallt öryggi og velferð allra sem taka þátt. Fylgst er náið með þátttakendum og þeir fá stuðning allan tímann frá framleiðsluteyminu, þar á meðal frá sérstöku og reynslumiklu velferðarteymi.“
Hefur áður opnað sig um geðrænan vanda
Acaster, sem er 41 árs, er þekktur fyrir uppistand og sem meðstjórnandi Off Menu-hlaðvarpsins ásamt Ed Gamble, sem einnig tengist The Traitors. Hann hefur auk þess komið fram í fjölmörgum vinsælum breskum skemmti- og spurningaþáttum, meðal annars Taskmaster.
Í bók sinni Perfect Sound Whatever, sem kom út árið 2019, fjallaði Acaster opinskátt um erfið tímabil í lífi sínu árið 2017.
Þá glímdi hann við sambandsslit, hætti hjá umboðsmanni sínum og var óviss um framtíðina á ferli sínum. Hann lýsti því síðar að hann hefði í fyrsta sinn upplifað alvarlegar sjálfsvígshugsanir og áttað sig á því að hann þyrfti á faglegri aðstoð að halda.
Með hjálp sálfræðimeðferðar og með því að sökkva sér í tónlist og list tókst honum að vinna sig út úr um árslöngu tímabili þunglyndis og mikils kvíða.
Acaster hefur sagt að það hafi hjálpað sér mikið að tengjast tónlistarfólki sem hafði gengið í gegnum svipaða erfiðleika.
Hafði áhyggjur af þátttökunni
Acaster hefur viðurkennt að hann hafi haft ákveðnar áhyggjur af því að taka þátt í Celebrity Traitors, sérstaklega eftir óvæntan sigur grínistans Alan Carr í fyrstu þáttaröðinni.
Í nýju þáttaröðinni taka fleiri grínistar þátt, meðal annars Rob Beckett, Joe Lycett og Joanne McNally. Acaster sagði það vera ákveðið áhyggjuefni.
„Það verður grunur um að þetta verði að minnsta kosti einn af þessum gæjum og að við myndum kannski mynda bandalag ef við yrðum ekki aðskildir,“ sagði hann.
Hann taldi jafnframt líklegt að grínistarnir yrðu undir smásjánni strax í upphafi, þegar þátttakendur hefðu lítið sem ekkert til að byggja grunsemdir sínar á.
Acaster grínaðist með það að sigur Alan Carr í fyrri þáttaröðinni hefði „spillt fyrir okkur öllum“ eftir að Carr hefði náð að afvopna aðra þátttakendur með húmor sínum.
Þrátt fyrir það hafi hann sjálfur verið mikill aðdáandi The Traitors og einfaldlega viljað fá að taka þátt.
„Mér fannst fyrsta Celebrity-þáttaröðin frábær og varð strax öfundsjúkur yfir því að ég væri ekki með. Ég varð bara að komast inn í þetta!“ sagði Acaster.
