32 ára kona lést eftir að hafa verið stungin í kviðinn í árás í Times Square í New York. Lögregla segir árásina hafa verið tilviljanakennda og tilefnislausa.

Konan hét Erin Piacenti og var frá New Jersey. Hún hafði nýverið eignast dóttur og aðeins fjórum dögum fyrir árásina birt mynd af sér ásamt eiginmanni sínum og nýfæddu barninu.

Hin 49 ára Pamela Cisneros er sögð hafa ráðist á Piacenti vopnuð tveimur hnífum. Skömmu áður hafði hún að sögn lögreglu stungið 68 ára karlmann í kviðinn þar sem hann beið eftir að komast yfir götu. Cisneros réðst í kjölfarið á Piacenti og stakk hana.

Lögreglumenn komu skömmu síðar á vettvang og skipuðu Cisneros að leggja frá sér hnífana. Jessica Tisch, lögreglustjóri New York, segir hana hafa neitað fyrirmælunum og hótað að drepa lögreglumennina. Lögregla skaut hana í kjölfarið og var hún síðar úrskurðuð látin á sjúkrahúsi.

Piacenti var einnig flutt á sjúkrahús en lést af sárum sínum. Hinn 68 ára maður var alvarlega særður en ástand hans hefur síðan náð stöðugleika.

Að sögn Tisch átti Cisneros sögu um geðræn veikindi.