Héraðsdómur Norðurlands vestra hefur dæmt 19 ára karlmann, Óliver Nóa Haraldsson, í 90 daga skilorðsbundið fangelsi fyrir brot gegn valdstjórninni sem áttu sér stað í september árið 2023.
Samkvæmt dómi málsins sparkaði Óliver í mjöðm lögreglumanns sem var við skyldustörf, hótaði öðrum lögreglumanni lífláti og beit þriðja lögreglumanninn í hægri olnboga þegar hann var fluttur í lögreglubifreið. Lögreglumaðurinn sem varð fyrir bitinu hlaut mar af völdum árásarinnar.
Ákærði mætti ekki við þingfestingu málsins í maí síðastliðnum en kom síðar fyrir dóminn þar sem hann játaði skýlaust þau brot sem honum voru gefin að sök. Jafnframt bað hann lögreglumennina sem urðu fyrir brotunum afsökunar. Í kjölfar játningarinnar var málið tekið til dóms án frekari sönnunarfærslu.
Við ákvörðun refsingar leit dómurinn meðal annars til þess að ákærði var ungur að árum þegar brotin voru framin, að hann hefði játað sök og að nokkur tími væri liðinn frá atvikunum. Þá kom einnig fram að hann ætti nokkurn sakaferil að baki og hefði áður hlotið skilorðsbundna dóma fyrir meðal annars húsbrot, gripdeild, vopnalagabrot, eignaspjöll og umferðarlagabrot.
Dómurinn taldi hæfilegt að refsing ákærða yrði ákveðin 90 daga fangelsi. Fullnustu refsingarinnar var þó frestað til tveggja ára og fellur hún niður haldi hann almennt skilorð á þeim tíma.
Jafnframt var honum gert að greiða 16.830 krónur í sakarkostnað.
