Lögreglan á höfuðborgarsvæðinu hafði afskipti af nokkrum ungmennum við Valhöll í nótt þegar þar fór fram kveðjuhóf á vegum ungra sjálfstæðismanna vegna flutnings höfuðstöðva Sjálfstæðisflokkurinn. Þetta kemur fram í frétt Vísis.

Samkvæmt upplýsingum frá lögreglu bárust fyrstu tilkynningar um ellefuleytið í gærkvöldi þegar tilkynnt var um ölvað ungmenni sem kastaði upp fyrir aftan húsið. Síðar bárust fleiri ábendingar um að einstaklingar undir lögaldri væru meðal gesta í samkvæminu.

Lögreglumenn fóru á vettvang og ræddu við nokkur ungmenni, þar á meðal dreng sem var sagður mjög ölvaður. Faðir hans kom síðar og sótti hann.

Að sögn lögreglu leystist samkvæmið upp skömmu fyrir miðnætti á meðan afskiptin stóðu yfir.

Fram kemur að um hafi verið að ræða fólk á sautjánda ári, þó ekki liggi fyrir hvort allir sem lögreglan ræddi við hafi verið inni á viðburðinum sjálfum.

Félög ungra sjálfstæðismanna á höfuðborgarsvæðinu stóðu fyrir viðburðinum sem bar heitið „Project XD“, þar sem Valhöll var kvödd eftir áratugalanga sögu sem höfuðstöðvar flokksins.