Framkvæmdasýslan – Ríkiseignir (FSRE) hefur auglýst eftir tilboðum í jarðvinnuframkvæmdir vegna byggingar nýs öryggisfangelsis að Stóra Hrauni í Árborg.
Um er að ræða framkvæmd við nýja fangelsið, sem hannað er til að mæta brýnni þörf og nútímakröfum í fangelsismálum ríkisins.
Verkið sem nú er í útboði lýtur að fyrsta áfanga verkefnisins. Það felur meðal annars í sér gerð vinnubúða, aðstöðusköpun á svæðinu, vegagerð, jarðvinnu undir undirstöður bygginga og lagningu veitukerfa ásamt rafstrengjum.
Tveggja áfanga framkvæmd upp á milljarða
Byggingunni er skipt í tvo áfanga og er áætlaður kostnaður við þann fyrri um 17,8 milljarðar króna. Í þeim áfanga verður lögð áhersla á uppbyggingu almennra fangarýma fyrir 56 fanga, auk skólabyggingar, vinnustofu, vöruhúss og hliðarbyggingar.
Í seinni áfanga verður ráðist í byggingu á sérstakri öryggisdeild fyrir 16 fanga, fyrirmyndardeildar fyrir 56 fanga, auk annarrar vinnustofu og starfsmannahúss ásamt tilheyrandi bílastæðum.
Þegar framkvæmdum verður að fullu lokið mun nýja öryggisfangelsið rúma 128 fanga. Verður það fyrsta fangelsi sinnar tegundar hér á landi og markar það stór tímamót í skipulagi fangelsismála.
