Gísla Má Gíslasyni, prófessor emeritus í vatnalíffræði, varð heldur betur brugðið þegar hann sá matseðilinn á Ice Cafe Bistro í Vík í Mýrdal.

Ekki náðist í eiganda veitingastaðarins við gerð fréttarinnar en Gísli telur þetta ekki boðlegt í opinberri færslu og leggur fram ljósmynd með færslunni.

„Er þetta boðlegt? Vel í lagt hjá Bistro í Vík í Mýrdal.“

Þegar matseðillinn er skoðaður sést að Gísli fer með enga lygi. Pylsan kostar 2350 krónur en á matseðlinum segir að þetta sé engin hefðbundin bensínstöðvarpylsa. Heldur sé þetta brjálæðislega vel útilátin pylsa sem á að gera þig sadda/n eins og hamborgari myndi gera.

Til samanburðar er hægt að verða sér úti um 10 pylsur í pakka í Krónunni á 1139 krónur. Þá kostar pylsa hjá Bæjarins beztu 880 krónur sem er töluvert ódýrara þó svo að þjóðarrétturinn hafi hækkað mikið á síðustu árum.