Óvíst er hversu marga frídaga Halla Tómasdóttir, forseti Íslands, mun taka á þessu ári samkvæmt Unu Sighvatsdóttur, sérstaks ráðgjafa hjá forsetaembættinu. Erfitt sé fyrir forseta að fastsetja samfellda frídaga vegna anna en Halla var gagnrýnd þegar hún fór í frí fyrr á árinu í stað þess að mæta á minningarathöfn um helförina í Auschwitz.
„Ekki er enn búið að fastsetja neitt samfellt frí fyrir forseta á árinu 2025,“ segir í svari Unu til Mannlífs um málið. „Hún mun taka sér nokkra daga í tengslum við útskriftir barna hennar úr háskóla í sumarbyrjun, en þeir dagar verða jafnan fléttaðir saman við vinnutengda fundi.
Reynslan er sú að það reynist jafnan erfitt í embætti forseta að fastsetja samfellda frídaga vegna mikilla anna, en þó er reynt að tryggja að forseti geti tekið sér eitthvað orlof með fjölskyldunni þegar hægt er að koma því við. Gera má ráð fyrir að svo verði í sumar.“
Mannlíf spurði einnig um frítöku Guðna Th. Jóhannessonar en hann var forseti í átta ár á undan Höllu, sem tók við embættinu í fyrra.
„Ég er ekki með upplýsingar á reiðum höndum um frítöku á fyrra kjörtímabili Guðna Th. Jóhannessonar, en á síðara kjörtímabilinu tók hann sér að jafnaði sumarfrí í um tvær vikur samfleytt hvert, samtals sex vikur á árunum 2021-2023,“ sagði Una um Guðna. „Árið 2021 var hann í fríi frá 19.-29. júlí þegar fjölskyldan ferðaðist saman innanlands. Árið 2022 var hann í sumarfríi frá 3.-18. ágúst þegar fjölskyldan ferðaðist saman til Kanada og árið 2023 fór fjölskyldan einnig saman til Kanada og var forseti þá í samfelldu sumarfríi frá 18. júlí til 2. ágúst. Árið 2024 tók hann sér ekkert samfleytt sumarfrí áður en hann lét af embætti þann 31. júlí.“
Halla verður á flakki um heiminn eins og algengt er hjá forseta Íslands og mun fara meðal annars til Japan, Kanada og Svíþjóðar á þessu ári.
„Ég get staðfest að framundan á árinu er önnur ríkisheimsókn, að þessu sinni til Svíþjóðar nú í byrjun maí í boði Karls XVI. Gústafs Svíakonungs,“ segir Una um staðfestar ferðir Höllu á þessu ári.
„Þá fer hún í nokkrar opinberar ferðir og heimsóknir sem þó eru ekki ríkisheimsóknir. Til dæmis ferðast hún til Japan í lok maí í tilefni af Íslandsdeginum í samnorræna sýningarskálanum á heimssýningu EXPO í Osaka. Þá ferðast hún til Kanada í ágúst þar sem hún verður heiðursgestur Íslendingadagshátíðarinnar í Manitóba. Í ár eru liðin 150 ár síðan fyrsti stóri hópur Íslendinga kom til Manitóba og stofnaði þar Nýja-Ísland og verður þess sérstaklega minnst á hátíðinni.“
Þá megi búast við fleiri ferðum í haust og vetur en það sé ótímabært að grein frá þeim að svo stöddu. Slíkt verði gert þegar nær dregur.
