Boðið hefur verið til samstöðugöngu fyrir Palestínu, sem hefst við bandaríska sendiráðið við Engjateig laugardaginn 17. maí klukkan 14:30. Gengið verður niður Laugaveg og á Austurvöll en það er félagið Ísland-Palestína sem stendur fyrir göngunni.

Páll Óskar Hjálmtýsson og Nadine Abu Arafeh flytja ávörp á samstöðufundinum á Austurvelli auk þess sem fyrrverandi Eurovision-keppendur Íslands leiða samsöng. Fram kemur í viðburðalýsingunni á Facebook að fundurinn verði táknmálstúlkaður af Margréti Baldursdóttur táknmálstúlki.

Í viðburðarlýsingunni er ástæðan fyrir samstöðugöngunni og fundinum útskýrð á eftirfarandi hátt:

„Allur heimurinn sér að það sem Ísrael er að gera á Gaza er þjóðarmorð. Á meðan stjórnmálafólk afsakar aðgerðarleysi sitt, krefst almenn­ing­ur aðgerða – og það strax. Við getum ekki látið orð og áskoranir duga til að eiga við ríki sem er að fremja hryllilegustu stríðsglæpi í áratugi. Við getum ekki látið eins og ekkert sé og tekið þátt í söngvakeppni við hlið ríkis sem fremur þjóðarmorð. Við getum ekki brugðist börnunum á Gaza sem eru nú svelt af Ísrael vikum saman ofan á það að vera sprengd, skotin eða gerð foreldra- og fjölskyldulaus. Við erum fólkið. Mætum. Mótmælum. Stöndum með mannúð og réttlæti.“