Fjórir gistu fangageymslur lögreglu eftir nóttina en alls voru 53 mál skráð í kerfi lögreglu frá klukkan 17 í gær til 5 í morgun.

Meðal verkefna lögreglunar á höfuðborgarsvæðinu var umferðarslys í póstnúmeri 105 þar sem rafhlaupahjól og bifreið rákust saman. Minniháttar meiðsli urðu á fólki en ökumaður rafhlaupahjólsins er grunaður um að hafa verið undir áhrifum fíkniefna.

Í miðborg Reykjavíkur var tilkynnt um líkamsárás. Meiðsli voru minniháttar en gerandinn var ókunnur þegar dagbókin var tekin saman. Þá var maður í annarlegu ástandi handtekinn í miðborginni vegna gruns um fíkniefnamisferli og vistaður í fangageymslu.

Ökumaður var stöðvaður í póstnúmeri 105 vegna gruns um akstur undir áhrifum fíkniefna. Hann var látinn laus að lokinni blóðsýnatöku.

Nokkur umferðarlagabrot komu einnig til kasta lögreglu. Þrír ökumenn voru staðnir að því að aka án ökuréttinda, í póstnúmerum 221, 200 og 109, og voru málin afgreidd með sektum.

Þá var ökumaður stöðvaður fyrir hraðakstur í Garðabæ eftir að hafa mælst á 115 kílómetra hraða þar sem hámarkshraði er 80 kílómetrar á klukkustund. Hann fékk sekt. Annar ökumaður var sektaður eftir að hafa ekið gegn rauðu ljósi í póstnúmeri 109.

Lögregla sinnti jafnframt tilkynningum um þjófnaði úr verslunum í Hafnarfirði og Grafarvogi. Bæði málin voru afgreidd á vettvangi.

Lögregla tekur fram að upptalningin sé ekki tæmandi.