Bandarískur lögmaður hefur verið sakfelldur fyrir tilraun til að myrða fyrrverandi eiginkonu sína á veitingastað í Toledo í Ohio. Tilraunin mistókst þar sem öryggislæsing skotvopnsins var enn á þegar hann reyndi að hleypa af.

Atvikið átti sér stað á veitingastaðnum Sabira í apríl 2025. Að sögn saksóknara gekk hinn 43 ára Matthew Exton inn á staðinn þar sem fyrrverandi eiginkona hans sat við borð ásamt fjölskyldu sinni.

Exton er sagður hafa sent drykk að borði hennar og hrækt í átt að fjölskyldunni áður en hann yfirgaf staðinn. Skömmu síðar sneri hann aftur vopnaður skammbyssu.

Saksóknarar segja Exton hafa gengið beint að borðinu og reynt að skjóta fyrrverandi eiginkonu sína. Skot hljóp hins vegar ekki úr byssunni þar sem öryggislæsing hennar var enn virk. Atvikið náðist á myndband.

Þjónn á veitingastaðnum brást þegar í stað við og réðst á Exton. Fleiri gestir komu þjóninum til aðstoðar og tókst þeim að yfirbuga Exton áður en hann gat gert aðra tilraun.

Saksóknari í Lucas-sýslu hefur lýst árásinni sem tilraun til „opinberrar aftöku“ og sagði Exton hafa mætt á staðinn með skýran ásetning.

Hæstiréttur Ohio svipti Exton tímabundið lögmannsréttindum mánuði eftir árásina. Kviðdómur hefur nú sakfellt hann fyrir tilraun til manndráps, tvær líkamsárásir og fleiri brot tengd notkun skotvopns.

Lengd dómsins verður ákveðinn í september.