Runólfur Ágústsson, félagsmaður í Leikfélagi Reykjavíkur og fyrrum Rektor Háskólans á Bifröst, birtir stuðningsyfirlýsingu til leikara í kjaradeilu þeirra við Borgarleikhúsið.
Í færslu þess efnis á Facebook undir titlinum „Til stuðnings leikurum í Borgarleikhúsinu í kjaradeilu“ segist hann horfa á kjaradeiluna með „nokkurri undran“.
„Það er ekki annað hægt en að horfa á kjaradeilu leikara í Borgarleikhúsinu við félagið sem rekur það hús með nokkurri undran. Hvernig má það vera að leikarar hjá Leikfélagi Reykjavíkur séu með lægstu meðallaun þeirra starfsmanna sem starfa í leikhúsinu?“
Það er fleira sem Runólfur furðar sig á. Til að mynda hvers vegna Leikfélag Reykjavíkur hafi ekki hagsmuni listafólksins í forgangi.
„Hvernig má það vera að Leikfélag Reykjavíkur, sem á sínum tíma var fyrst og síðast félag leikara og starfsfólks, skuli ekki hafa hagsmuni listafólksins, sem starfsemi Borgarleikhússins snýst um, í forgangi? Á hverju heldur stjórn Leikfélags Reykjavíkur að starfsemi leikhússins byggi? Markaðsfólki, mannauðsstjórum eða þeim sem selja vín eða nammi í hléi?“ spyr hann.
Runólfur spyr einnig hvenær Leikfélag Reykjavíkur hafi orðið viðskila við leikarana og af hverju félagið sé aðili að Samtökum atvinnulífsins.
„Hvernig gerðist það að Leikfélag Reykjavíkur varð viðskila við leikarana sem starfa fyrir félagið? Þegar ég var starfsmaður félagsins fyrir áratugum síðan, var Leikfélag Reykjavíkur fyrst og síðast félagsskapur leikara og starfsfólks í Iðnó. Hvað breyttist og hvenær?
Af hverju er Leikfélag Reykjavíkur aðili að Samtökum atvinnulífsins og beitir þeim fyrir sig í kjaraviðræðum við eigið fólk og félagsmenn? Borgarleikhúsið er í grunninn starfsmannarekið leikhús þar sem félagsskapur þess og annars áhugafólks um leiklist rekur leikhúsið. Stjórn þess starfar í umboði félagsmanna í þágu listarinnar og á að geta mætt leikurum, starfsfólki og félagsmönnum milliliðalaust án milligöngu atvinnulífsins og samtaka þeirra sem hafa öðru hlutverki að gegna í samfélaginu.“
Í niðurlagi færslunnar fer Runólfur yfir tilgang leikhúsa og segir að borga skuli leikurum laun sem þeir eigi skilið.
„Tilgangur leikhúsa er leiklist. Hugmyndin að baki Leikfélagi Reykjavíkur var sú að afrakstur sýninga og leikhússtarfs rynni til leikara og annars starfsfólk í eðlilegu hlutfalli. Leikfélag Reykjavíkur er ekki og á ekki að vera hagnaðardrifið félag, þótt gott sé í slíkum félögum og stofnunum að eiga góðan varasjóð.
Borgum leikurum þau laun sem þeir vinna fyrir, eiga skilið og félagið hefur fjárráð til.“
Undir bréfið skrifar Runólfur sem fyrrverandi leikhúsritari Leikfélags Reykjavíkur og félagsmaður í Leikfélagi Reykjavíkur. Sömuleiðis var Runólfur blaðafulltrúi leikfélagsins á níunda áratugnum.
Ýmsir nafntogaðir einstaklingar hafa tjáð sig í athugasemdum við færsluna og lýsa stuðningi sínum við leikara. Edda Björgvinsdóttir, stórleikkona, deildi færslunni og skrifar „Nákvæmlega“.
Egill Helgason, fjölmiðlamaður og listunnandi skrifaði einfaldlega: „Heyr." Guðmundur Andri Thorsson skrifaði svipaða athugasemd: „Tek undir þetta“.
Helga Vala Helgadóttir, lögmaður og leikkona er mjög sammála Runólfi og skrifar: „Já, þetta er alveg fáránlegt. Leikhúsið, listagallerý, tónleikahallir, allir með hærri laun en sjálfir listamennirnir. Hið tvenna síðarnefnda er nú gjarnan reynt að lóðsa inn í sjálfboðavinnu.“
