Lögreglan hafði í nógu að snúast í gærkvöldi og nótt samkvæmt færslu úr málaskrá. Alls voru sex aðilar vistaðir í fangageymslu í tengslum við fjölbreytt brot, þar á meðal fíkniefnamál, umferðarlagabrot og brot gegn lögreglusamþykkt.
Í Laugardalnum voru tveir aðilar handteknir grunaðir um sölu og dreifingu fíkniefna. Þá var ökumaður í Reykjavík handtekinn fyrir fíkniefnaakstur og akstur sviptur ökuréttindum.
Í miðbæ Reykjavíkur voru þrír aðilar handteknir í aðskildum málum fyrir brot gegn lögreglusamþykkt. Þar að auki var einn aðili handtekinn vegna gruns um innbrot og vörslu fíkniefna.
Umferðarlagabrot voru einnig áberandi. Í Reykjavík var ökumaður kærður fyrir að aka á 160 km/klst þar sem hámarkshraði er 80 km/klst og var sviptur ökuréttindum á staðnum. Í Kópavogi var annar ökumaður kærður fyrir að aka á 72 km/klst þar sem leyfilegur hámarkshraði er 40 km/klst.
Í Hafnarfirði var aðili handtekinn fyrir brot gegn lögreglusamþykkt, að hlýða ekki fyrirmælum lögreglu og húsbrot. Þá var ökumaður í Hafnarfirði kærður fyrir akstur án gildra ökuréttinda.
Frekari mál komu upp í Árbæ, þar sem ökumaður var kærður fyrir akstur sviptur ökuréttindum. Annar ökumaður var handtekinn í sama hverfi fyrir ölvunar-, fíkniefna- og sviptingarakstur. Skömmu síðar var annar ökumaður handtekinn fyrir sambærileg brot á sömu bifreið í Grafarvogi.
