Eggert Ólafur Ásgeirsson, fyrrverandi framkvæmdastjóri Rauða kross Íslands, er látinn, 97 ára að aldri.
Morgunblaðið greinir frá andláti hans.
Eggert varð stúdent frá Menntaskólanum í Reykjavík árið 1949. Hann nam læknisfræði við Háskóla Íslands áður en hann hélt til Stokkhólms og lauk heilbrigðisfulltrúaprófi árið 1955.
Sama ár hóf Eggert störf hjá Borgarlæknisembættinu í Reykjavík. Hann var framkvæmdastjóri Rauða kross Íslands á árunum 1969 til 1981 og starfaði síðar meðal annars fyrir Samband íslenskra hitaveitna og rafveitna og Samorku.
Eggert var þekktur fyrir mikla ræktarsemi við vini og hélt um árabil utan um samkomur samstúdenta sinna.
Eftirlifandi eiginkona hans er Sigríður Dagbjartsdóttir. Börn þeirra eru Ingibjörg, Ásgeir, Dagur og Auður.
