Karlmaður hefur verið dæmdur í 45 daga fangelsi og til greiðslu 950 þúsund króna sektar fyrir fíkniefna- og umferðarlagabrot. Þá var hann sviptur ökurétti ævilangt. Dómur féll í Héraðsdómi Reykjaness í dag.
Málið varðar brot sem framin voru á tímabilinu frá maí til nóvember árið 2024. Meðal annars var maðurinn sakfelldur fyrir vörslur fíkniefna og fíkniefnaakstur.
Eitt atvikanna átti sér stað 7. júní 2024. Lögreglumenn komu þá að húsnæði þar sem maðurinn var staddur og fundu mikla kannabislykt. Samkvæmt dóminum sat hann við stofuborð þegar lögreglu bar að garði. Hann stóð þá upp, kastaði frá sér fíkniefnum og hljóp að glugga í enda herbergisins.
Maðurinn opnaði gluggann, stökk út og tók á rás. Hann sinnti ekki fyrirmælum lögreglu um að stöðva för sína en lögreglumenn hlupu hann að lokum uppi.
Á borðinu fundust kannabisefni, vigt og fjöldi smelluláspoka. Í tösku voru einnig nokkrir pokar með kannabisefnum í sölueiningum. Hluti efnanna fannst fyrir utan gluggann sem maðurinn hafði stokkið út um. Alls lagði lögregla hald á 49,21 gramm af maríhúana og við leit á honum fundust 0,48 grömm af amfetamíni.
Farsími fíkniefnasalans var jafnframt haldlagður og við rannsókn hans fundust samskipti sem dómurinn taldi benda til fíkniefnaviðskipta. Í Telegram-samskiptum spurði kaupandi eftir fimm grömmum og svaraði notandi símans að hann væri með kannabistegundirnar „chewdawg“, „Lemon alien dawg“ og „gorilla glue“. Kaupandinn óskaði í kjölfarið eftir tveimur grömmum af einni tegund og þremur af annarri.
Sölumaður dauðans neitaði því að hafa selt fíkniefni og hélt því fram að annar maður hefði átt samskiptin í síma hans. Dómurinn taldi skýringar hans ótrúverðugar og taldi sannað að hann hefði haft fíkniefnin í vörslum sínum.
