Umboðsmaður Alþingis telur ekki tilefni til að gera athugasemdir við ákvörðun Bílastæðasjóðs Reykjavíkur um álagningu stöðvunarbrotsgjalds á ökumann sem lagði bifreið sinni í stæði ætlað rafhleðslu.

Einstaklingurinn kvartaði til umboðsmanns í júlí og taldi meðal annars að Bílastæðasjóður hefði áður fallið frá gjaldinu en síðar tekið málið upp að nýju. Þá hélt hann því fram að merkingar við stæðið væru ófullnægjandi þar sem það væri bæði ætlað hreyfihömluðum og bifreiðum til rafhleðslu.

Við athugun umboðsmanns kom hins vegar í ljós að um tvö aðskilin stöðvunarbrotsmál var að ræða. Annað varðaði brot 20. mars og hafði Bílastæðasjóður fallið frá gjaldinu í því máli. Hitt varðaði brot 10. júní og var beiðni um endurupptöku þess máls hafnað fimm dögum síðar.

Athugun umboðsmanns laut því eingöngu að síðara málinu.

Af gögnum málsins og ljósmyndum af vettvangi þótti ljóst að bifreiðinni hafði verið lagt í stæði sem merkt var með umferðarmerki 553.4. Merkið gefur til kynna að stæði sé ætlað bifreiðum til rafhleðslu.

Umboðsmaður tók jafnframt fram að engar merkingar á vettvangi gæfu til kynna að stæðið væri ætlað hreyfihömluðum.

Taldi umboðsmaður því ekki tilefni til athugasemda við ákvörðun Bílastæðasjóðs.