Bandaríska sjónvarpskonan Savannah Guthrie birti í morgun myndskeið á Instagram þar sem hún beinir ákalli til þess eða þeirra sem rændu móður hennar, Nancy Guthrie, fyrir tveimur vikum.

Í myndskeiðinu segir Savannah að fjölskyldan hafi ekki misst vonina og hvetur ræningjana til að gera hið rétta og koma móður hennar heim.

„Mig langaði að koma hér inn, það eru nú tvær vikur síðan mamma okkar var numin á brott, og mig langaði bara að segja að við höfum enn von og við trúum enn,“ segir Savannah í myndskeiðinu.

Hún beinir síðan orðum sínum beint til þess sem heldur móður hennar eða veit hvar hún er:

„Og mig langar að segja við þann sem heldur henni eða veit hvar hún er: það er aldrei of seint. Þú ert ekki yfirgefinn og ekki einn. Og það er aldrei of seint að gera hið rétta.“

Savannah ítrekar að fjölskyldan trúi á mannlega gæsku og vonist enn eftir lausn málsins.

„Við erum hér. Við trúum. Og við trúum á grundvallargæsku hvers einasta manns. Og það er aldrei of seint.“

Rannsókn á hvarfi Nancy Guthrie stendur enn yfir en á dögunum var bíll gerður upptækur en hann fannst tveimur mílum frá heimili Nancy, þar sem hún var numin á brott. Þá hefur myndband af meintum mannræningja verið birt en hann er með grímu og því erfitt að sjá hvernig hann lítur út.