Við Funafold 77 í Grafarvogi er nú til sölu glæsilegt einbýlishús á einni hæð með innbyggðum bílskúr og miklu útsýni. Húsið var byggt árið 1988 og er ásett verð 159 milljónir króna.

Eignin hefur verið í eigu sömu fjölskyldu frá upphafi og hefur verið vel við haldið. Um er að ræða rúmgott hús þar sem parket og flísar eru á gólfum og 3ja fasa rafmagn er til staðar. Inn af bílskúrnum er góð geymsla og hiti er bæði í bílaplani og stéttum upp að húsinu sem og meðfram austurhlið þess.

Garðurinn er sagður í góðri rækt og við húsið eru verönd til suðurs og vesturs auk svala út frá stofu. Þá er upplýstur göngustígur fyrir aftan húsið sem eykur útivistarmöguleika á svæðinu.

Húsið stendur ofarlega í götunni og nýtur því mikils útsýnis yfir nærumhverfið.