Glæsilegt og mikið endurnýjað einbýlishús við Furugrund 26 á Akranesi hefur verið sett á sölu fyrir 147,9 milljónir króna. Um er að ræða 333,1 fermetra eign, þar af 36 fermetra bílskúr, sem býður upp á aukaíbúð með sérinngangi og möguleika á góðum leigutekjum.

Húsið var byggt árið 1975 og hefur verið endurnýjað verulega. Samkvæmt fasteignaauglýsingu er eignin tíu herbergja og skiptist í rúmgóða aðalíbúð á efri hæð og sjálfstæða íbúð á neðri hæð.

Á efri hæð tekur á móti gestum forstofa með góðu skápaplássi og gestasnyrtingu. Eldhús er opið og bjart og tengist rúmgóðu alrými með stofu, borðstofu og sólstofu. Þaðan er útgengt á stóra suðurverönd með heitum potti. Inn af eldhúsinu er þvottahús sem nýtist jafnframt sem búr og geymsla.

Svefnherbergin á aðalhæð eru fjögur, þar af rúmgott hjónaherbergi með góðu skápaplássi og útgengi út á suðursvalir. Auk þess er þar stórt baðherbergi með baðkari og sturtu. Innan aðalíbúðar er einnig stigi niður á neðri hæð þar sem er rúmgott um 20 fermetra herbergi og geymsla, en lokað hefur verið fyrir beint aðgengi yfir í aukaíbúðina.

Aukaíbúðin hefur sérinngang og samanstendur af forstofu, baðherbergi, þvottahúsi, eldhúsi, rúmgóðri stofu og borðstofu með arni auk þriggja svefnherbergja. Hentar vel fyrir stórar fjölskyldur eða þá sem vilja nýta hluta eignarinnar til útleigu.

Eignin stendur í eftirsóttu íbúðarhverfi þar sem stutt er í skóla, leikskóla og íþróttamannvirki.