Biskup Íslands hefur ráðið tvo nýja presta til starfa eftir að embætti voru auglýst laus til umsóknar. Séra Sveinbjörg Katrín Pálsdóttir hefur verið ráðin héraðsprestur við Vestfjarðaprófastsdæmi með sérstakar skyldur við Hólssókn í Bolungarvík, en Hilmir Kolbeins hefur verið ráðinn prestur í Austfjarðaprestakalli með sérstakar skyldur við Norðfjarðar-, Eskifjarðar- og Reyðarfjarðarsóknir.
Þjóðkirkjan greinir frá þessu í tilkynningu.
Sveinbjörg hefur undanfarin átta ár starfað sem sjúkrahúsprestur við Landspítalann. Áður gegndi hún starfi skrifstofu- og mannauðsstjóra Biskupsstofu og hefur auk þess sinnt fjölmörgum trúnaðarstörfum innan Þjóðkirkjunnar og á vettvangi Prestafélags Íslands.
Hilmir Kolbeins starfaði hjá lögreglunni í tæpan aldarfjórðung áður en hann hóf störf sem öryggisstjóri hjá Steypustöðinni. Hann lauk guðfræðinámi árið 2020 og hefur einnig stundað viðbótarnám í sálgæslu og sálrænni skyndihjálp. Samhliða störfum stundar hann nám í sálfræði við Háskólann á Akureyri.
Hilmir tekur til starfa 1. ágúst næstkomandi og mun þiggja prestvígslu síðar í sumar.
