Sigríður Þorvaldsdóttir, leikkona og leikstjóri, lést á Landspítalanum 31. ágúst síðastliðinn, 85 ára að aldri.

Sigríður útskrifaðist frá Leiklistarskóla Þjóðleikhússins árið 1958 og steig sama ár fyrst á svið Þjóðleikhússins. Hún stundaði síðar framhaldsnám í leiklist í Bandaríkjunum og starfaði meðal annars hjá Dallas Theater Center.

Eftir heimkomuna varð Sigríður fastráðin leikkona við Þjóðleikhúsið og fór þar með fjölmörg eftirminnileg hlutverk. Hún starfaði einnig sem leikstjóri í leikhúsi, sjónvarpi og við Íslensku óperuna.

Sigríður sat um skeið á Alþingi fyrir Kvennalistann og gegndi formennsku í Félagi íslenskra leikara. Hún lék jafnframt í kvikmyndum á borð við Veiðiferðina og Stellu í orlofi.

Sigríður lætur eftir sig eiginmann og þrjár dætur.