Mikið öngþveiti skapaðist á hátíð í Wisconsin í Bandaríkjunum þegar fjöldi slagsmála braust út á og við hátíðarsvæðið. Sjö voru handteknir í tengslum við ólætin.

Myndskeið sem hafa farið í dreifingu á samfélagsmiðlum sýna fólk sparka og kýla hvert annað auk þess sem nokkrir sjást felldir til jarðar. Atvikin áttu sér stað á sunnudagskvöld, skömmu áður en árlegri hátíðinni lauk.

Í yfirlýsingu frá skipuleggjendum hátíðinnar kemur fram að óeirðirnar hafi hafist þegar hópur fólks reyndi að komast inn á hátíðarsvæðið án heimildar.

Ástandið varð fljótt það alvarlegt að lögregla hátíðarsvæðisins kallaði eftir aðstoð frá lögreglunni í Milwaukee og West Allis. Fjölmennt lögreglulið var sent á vettvang til að stöðva átökin og koma á ró.

Gestur á hátíðinni sagði í samtali við fjölmiðilinn TMJ4 Milwaukee að mörg slagsmál hefðu átt sér stað samtímis. Aðrir sjónarvottar lýstu miklum ótta meðal gesta og sögðu meðal annars að börn hefðu grátið þegar átökin stóðu sem hæst.

Engin alvarleg meiðsl voru tilkynnt að sögn skipuleggjenda. Orðrómur fór einnig á kreik um að skotum hefði verið hleypt af á svæðinu en lögregla staðfesti síðar að þær upplýsingar ættu ekki við rök að styðjast.

Fyrstu ellefu dagar hátíðarinnar höfðu gengið án teljandi vandræða. Það breyttist hins vegar á síðustu klukkustundunum þegar átökin brutust út.

Lögregla rannsakar málið áfram og alls voru sjö einstaklingar handteknir vegna ólátanna.