Slátrari í írösku borginni Najaf hefur verið dæmdur í tíu ára fangelsi fyrir að selja svínakjöt sem nautakjöt. Málið hefur vakið mikla athygli í Írak, enda er Najaf ein helgasta borg sjía-múslima.
Æðsta dómsmálaráð Íraks greindi frá því á mánudag að maðurinn hefði verið staðinn að því að selja 75 kíló af svínakjöti undir því yfirskini að um nautakjöt væri að ræða.
„Dómstóll Najaf hefur dæmt einstakling í tíu ára fangelsi fyrir sölu á kjöti sem ekki var hæft til manneldis,“ sagði í tilkynningu ráðsins.
Neysla svínakjöts er bönnuð samkvæmt íslam þar sem kjötið er talið óhreint. Írösk lög banna þó ekki sérstaklega sölu þess, en kristinn minnihluti býr í landinu.
Dómurinn byggði á lögum frá árinu 1998 sem gera það refsivert að selja hunda-, asna- eða annað kjöt sem talið er óhæft til manneldis.
Najaf hefur sérstaka trúarlega þýðingu fyrir sjía-múslima og heimsækja milljónir pílagríma borgina árlega. Þar er grafhýsi Imam Ali, tengdasonar Múhameðs spámanns, fjórða kalífans og fyrsta imams sjía-múslima.
Málið hefur vakið mikla umræðu á samfélagsmiðlum. Sumir hafa kallað eftir auknu matvælaeftirliti en aðrir gert grín að málinu.
Íbúinn Ahmad al-Mansouri var meðal viðskiptavina slátrarans. Hann sagðist hafa keypt hakkað kjöt hjá honum og talið það vera bæði óvenju gott og ódýrt. Hann fór því að versla þar reglulega.
„Við urðum mjög hissa þegar hann var handtekinn fyrir að selja svínakjöt,“ sagði Mansouri, sem grínaðist með að hann hefði líklega borðað meira svínakjöt en nautakjöt eða lambakjöt undanfarin ár.
