Tanja Fajon, utanríkisráðherra Slóveníu, greindi frá því að landið hafi samþykkt að setja öfgahægri ráðherra Ísraels, Itamar Ben-Gvir öryggisráðherra og Bezalel Smotrich fjármálaráðherra, á svartan lista.

Að sögn Fajon er markmið aðgerðarinnar að setja „þrýsting á ísraelsku ríkisstjórnina til að bæta óásættanlegar aðstæður á Gaza og binda enda á þjáningar óbreyttra borgara“.

Ben-Gvir og Smotrich, sem eru í ríkisstjórn Benjamíns Netanyahu forsætisráðherra, búa báðir í ólöglegum landtökubyggðum Ísraela á hertekna Vesturbakkanum og hafa hvatt til þess að svæðið verði formlega innlimað.

Frá upphafi stríðsins á Gaza hafa ráðherrarnir kallað eftir því að Ísrael þjóðernishreinsi svæðið og stöðvi alla aðstoð við Palestínumenn. Þeir hafa jafnframt hótað að yfirgefa stjórnarsamstarfið ef stríðinu lýkur.

Aðgerðir Slóveníu fela í sér að ráðherrunum verður bannað að koma til landsins, sem stjórnvöld segja vera fordæmalaust innan Evrópusambandsins.

Stjórnin sakaði jafnframt Ben-Gvir og Smotrich um að hvetja til „ofbeldis og alvarlegra mannréttindabrota gegn Palestínumönnum“ með „útrýmingarhvetjandi yfirlýsingum sínum“.

Al Jazeera fjallaði um málið.