Persónuvernd hefur áminnt starfsmann Landspítalans fyrir að fletta ítrekað upp sjúkraskrá konu án þess að hafa lögmætt erindi í hana. Starfsmaðurinn, sem er kona, fletti sjúkraskrá hennar upp níu sinnum á rúmlega tveggja og hálfs árs tímabili, frá 2021 til 2024.

Í kvörtun vegna málsins kom fram að starfsmaðurinn hefði aldrei komið að meðferð konunnar. Hún gat heldur ekki sýnt fram á að uppflettingarnar hefðu tengst störfum hennar eða að önnur lögmæt ástæða hefði verið fyrir þeim.

Eftirlitsnefnd um rafræna sjúkraskrá á Landspítala taldi háttsemina brjóta gegn lögum um sjúkraskrár og lögum um réttindi og skyldur ríkisstarfsmanna. Málið var tilkynnt til embættis landlæknis og Persónuverndar.

Starfsmaðurinn svaraði ekki beiðni Persónuverndar um að tjá sig og skilaði ekki umbeðnum upplýsingum.

Persónuvernd taldi starfsmanninn sjálfan bera ábyrgð á uppflettingunum þar sem hún hefði farið út fyrir aðgangsheimildir sínar. Uppflettingarnar samrýmdust ekki persónuverndarlögum og var starfsmaðurinn áminntur. Ekki þótti þó tilefni til að leggja á hana stjórnvaldssekt.