22 ára gamall maður hefur játað að hafa orðið belgískri móður sinni að bana á spænsku Kanaríeyjunni Fuerteventura, samkvæmt fréttum spænskra fjölmiðla.

Fórnarlambið, Katty Oosterlinck, var 56 ára belgísk kona sem hafði búið í yfir tíu ár í bænum Corralejo. Hún var tilkynnt týnd þann 4. maí eftir að fjölskylda hennar og vinir náðu ekki sambandi við hana.

Lík hennar fannst sundurlimað á föstudag á ruslahaug í Zurita eftir umfangsmikla leit lögreglu.

Samkvæmt rannsókn spænskra yfirvalda er talið að Oosterlinck hafi verið ráðin bani skömmu eftir að hún kom heim þann 3. maí, eftir að hafa eytt kvöldinu með vinkonu sinni í aðdraganda mæðradagsins.

Lögregla segir að sonur hennar, Aaron, hafi í fyrstu neitað að vinna með rannsakendum. Eftir því sem sönnunargögnum gegn honum fjölgaði hafi hann hins vegar játað verknaðinn.

Rannsakendur telja að hinn grunaði hafi limlestað líkið, komið líkamsleifunum fyrir í plastpokum og skilið þá eftir í ruslagámi. Pokarnir voru síðar fluttir með sorpbifreið á urðunarstaðinn í Zurita þar sem líkamsleifarnar lágu faldar í nokkra daga.

Þá herma upplýsingar lögreglu að upptökur úr öryggismyndavélum sýni manninn kaupa verkfæri og plastpoka skömmu áður en brotið var framið. Talið er að verkfærunum hafi síðar verið fargað ásamt líkamsleifunum.

Málið er áfram til rannsóknar hjá spænskum yfirvöldum.