Fjölmiðlamaðurinn og Sjálfstæðismaðurinn Stefán Einar Stefánsson er allt annað en sáttur við frétt sem Vísir birti fyrr í dag.
Telur hann rangt hjá fjölmiðlinum að verðbólga hafi hækkað lítillega eins og Vísir segir frá í fyrirsögn.
„Þetta er í raun glórulaus fréttaflutningur, ef fréttaflutning skildi kalla. Verðbólga eykst ekki lítillega. Verðlag hækkaði um næstum heilt prósentustig milli mánaða. Það jafngildir amk 12% verðbólgu á ársgrundvelli,“ skrifar Stefán á samfélagsmiðla.
Að mati Stefáns hunsaði ríkisstjórnin ráðleggingar sérfræðinga þegar mikilvægar ákvarðanir voru teknar og hafi það leitt til þeirrar stöðu sem nú blasir við. Hann telur jafnframt að staðan geti reynst ríkisstjórninni pólitískt hagstæð í aðdraganda þjóðaratkvæðagreiðslunnar um áframhaldandi aðildarviðræður við Evrópusambandið sem fyrirhuguð er 29. ágúst.
Í pistlinum heldur hann því fram að aukin verðbólga, óvissa og skortur á horfum um vaxtalækkanir geti aukið óánægju meðal almennings og þannig haft áhrif á afstöðu kjósenda til málsins.
Stefán varar einnig við því að Ísland myndi missa af mikilvægum tækifærum ef sótt yrði á ný um aðild að Evrópusambandinu. Hann telur að slíkt ferli myndi binda verulegan hluta stjórnsýslunnar við að samræma íslensk lög og reglur regluverki sambandsins.
Að hans mati myndi það leiða til aukins skrifræðis, flóknara regluverks og meiri umsvifa innan stjórnsýslunnar, á sama tíma og önnur mikilvæg verkefni og tækifæri landsins yrðu sett til hliðar
Fyrrum þingmaður ósammála
Einn af þeim sem er ósammála Stefán, að hluta til, er Björn Leví Gunnarsson, fyrrum þingmaður Pírata.
Í athugasemd sinni við færslu Stefáns bendir hann á að vísitala neysluverðs hafi hækkað um 0,94 prósent milli mánaða. Hann segir jafnframt að sá mánuður sem hafi fallið út úr tólf mánaða samanburðinum hafi verið með 0,84 prósenta hækkun. Að hans mati þýði það að verðbólgan hafi vissulega hækkað lítillega, en að breytingin verði að skoðast í réttu samhengi.
Björn Leví rifjar upp að mánaðarbreytingar í júní hafi verið 1,41 prósent árið 2022, 0,85 prósent árið 2023, 0,48 prósent árið 2024 og 0,84 prósent árið 2025. Hann segir þessar tölur sýna að júnímánuður hafi almennt verið mánuður með tiltölulega miklar verðhækkanir undanfarin ár.
Þrátt fyrir það tekur hann fram að nýjustu tölurnar séu ekki góðar og að verðbólguþróunin gefi ekki tilefni til ánægju.
Björn Leví gagnrýnir einnig efnahagsaðgerðir stjórnvalda og telur að þær hafi enn ekki skilað þeim árangri sem stefnt var að. Að hans mati sýni nýjustu verðbólgutölurnar að sú nálgun sem beitt hefur verið hafi ekki reynst árangursrík og að fyrirhugað plan stjórnvalda sé enn ekki farið að skila tilætluðum áhrifum.
