Ný rannsókn alþjóðlegs hóps vísindafólks, þar á meðal við Háskóla Íslands, sýnir að mataræði sem einkennist af neyslu mikillar fitu, sykurs og unnins matar á meðgöngu getur aukið hættu á taugaþroskaröskunum eins og ADHD og einhverfu hjá börnum þeirra.

Greint var frá niðurstöðum rannsóknarinnar í vísindatímaritinu Nature Metabolism á dögunum. Vísindahópurinn segir að rannsóknin skapi tækifæri til að bæta og fylgja betur eftir ráðleggingum um mataræði til barnshafandi kvenna.

Gögnin sem rannsóknin byggðist á koma úr fjórum dönskum og bandarískum gagnabönkum sem geyma meðal annars upplýsingar um neyslumynstur yfir 60 þúsund óléttra kvenna og ADHD-greiningar í hópi barna þeirra. Að auki rannsakaði hópurinn blóðsýni úr bæði mæðrum og börnum og nýttu svokallaða umbrotsefnamengjafræði (e. metabolomics), sem snýst um að mæla styrk tilekinna efna í líkamanum, til þess að varpa skýrara ljósi á samband mataræðis við taugaþroskaraskanir. Enn fremur var tekið tillit til fjölmargra þátta í rannsókninni, sem hafa áhrif á taugaþroskaraskanir, eins og erfða, en rannsóknir hafa leitt í ljós að þær eiga stóran þátt í þróun slíkra raskana.

Skýr tengsl fundust í rannsókninni á milli vestræns matarræðis mæðranna og ADHD og einhverfu hjá börnum þeirra. Vestrænt mataræði einkennist af mikilli neyslu á feitum, sykruðum og unnum mat en lítilli fisk-, grænmetis- og ávaxtaneyslu. Því meira sem barnshafandi konur fylgdu hinu vestræna mataræði því meiri hætta var á því að barnið sem þær báru undir belti yrði greint með ADHD eða einhverfu.

Vísindamennirnir benda á að jafnvel aðeins lítil breyting á mataræði móður í átt að því vestræna, jók líkur um 66% að barn greyndist með ADHD og að það greindist með einhverfu um 122%. Á sama tíma sýnir rannsóknin að sömu breytingar á mataræði í átt frá vestænu mataræði, geti mögulega dregið úr hættunni á taugaþroskaröskunum hjá börnum. Undirstrikar hópurinn að rannsóknin sýni fram á sterkt tengsl milli mataræðis …