Háttsettur stjórnandi hjá rússneska tæknirisanum Yandex, Sergei Loyter, fannst látinn í Svetloyarsky-héraði í Volgograd-fylki en hann var í hópi fiskimanna sem saknað var eftir að þeir fóru út á Volgufljót á vélbáti en veður var slæmt.
Samkvæmt fréttamiðlinum V1.ru var leitað að fjórum mönnum eftir að þeir fóru á mótorbát til veiða nærri smáþorpinu Gromki þann 24. apríl. Þegar þeir skiluðu sér ekki aftur um hádegi hófst leit. Meðal þeirra sem saknað var var Alexander Nazarov, athafnamaður og tengdafaðir Loyters.
Lík eins manns fannst sama dag á bökkum Volgu og var hann sagður vera Igor Prokhorov, ökumaður Nazarovs. Hann var með áverka á höfði og talið að báturinn hafi annaðhvort hvolft eða lent á einhverju á leiðinni til baka.
Tveir til viðbótar fundust látnir daginn eftir og var annar þeirra staðfestur sem Loyter, 42 ára gamall. Leitin að fjórða manninum, sem líklegast er tengdafaðir hans, stendur enn yfir.
Rannsóknarnefnd hefur hafið sakamálarannsókn vegna gruns um brot á öryggisreglum við rekstur flutninga á skipgengum vatnaleiðum innanlands sem leiddi til dauða tveggja eða fleiri.
Loyter starfaði sem viðskiptastjóri hjá Yandex á árunum 2022 til 2024 en færði sig síðar yfir til Yango, þar sem hann stýrði sviði gervigreindar, auglýsingatækni og leitarbestunar. Samkvæmt rússneska viðskiptablaðinu Kommersant var hann einnig með litháenskan ríkisborgararétt.
Loyter er að minnsta kosti 20. háttsetti stjórnandinn sem lætur lífið við grunsamlegar aðstæður í Rússlandi frá því að stríðið í Úkraínu hófst. Hér má sjá nokkur nýleg dæmi:
- Í september á síðasta ári fannst höfuðlaust lík framkvæmdastjóra kalí- og magnesíumsaltnámafyrirtækis.
- Í ágúst lést stjórnarformaður Uralkali.
- Árið 2023 fundust Vyacheslav Rovneyko, forstjóri Interregional Fuel Union, og Igor Shkurko, aðstoðarforstjóri Yakutskenergo, látnir.
- Árið 2024 fannst Vitaly Robertus, varaforseti Lukoil, látinn með merki um sjálfsvíg.
- Árið 2025 féll Andrei Badalov, varaforseti Transneft, fram af svölum.
