Nóttin var erilsöm hjá lögreglunni á höfuðborgarsvæðinu en starfsfólk veitingastaðar í miðborg Reykjavíkur kallaði eftir aðstoð eftir að hópur gesta yfirgaf staðinn en skildi einn mann eftir sem gat ekki greitt reikninginn. Málið er nú til rannsóknar hjá lögreglu.
Þetta er meðal þess sem kemur fram í dagbók lögreglu frá því í gærkvöldi og í nótt.
Alvarlegt atvik varð einnig í Kópavogi þar sem maður var handtekinn eftir að hafa ógnað börnum með hnífi og reynt að ræna þau hlaupahjóli. Samkvæmt lögreglu var maðurinn í mjög annarlegu ástandi og var vistaður í fangaklefa.
Stundaði sjálfsfróun í runna fyrir framan ungmenni
Í Breiðholti var tilkynnt um mann sem stundaði sjálfsfróun í runna fyrir framan ungmenni. Lögregla fór á vettvang og rannsakar málið.
Auk þess var tilkynnt um mann sem reyndi að stela reiðhjóli við heimahús. Sá var sagður hafa verið vopnaður og í annarlegu ástandi og var einnig vistaður í fangaklefa á meðan málið er rannsakað.
Lögreglu barst einnig tilkynning um innbrot í geymslu við íbúðarhús og var málið rannsakað á vettvangi.
Húsráðendum gert að lækka tónlistina
Tvær kvartanir bárust vegna hávaða frá heimahúsum, annars vegar í miðborgarsvæðinu og hins vegar í Kópavogi. Í báðum tilvikum var húsráðendum gert að lækka tónlistina.
Fimm ökumenn voru stöðvaðir grunaðir um akstur undir áhrifum áfengis eða fíkniefna. Tveir þeirra voru jafnframt sviptir ökuréttindum. Allir voru látnir lausir að lokinni blóðsýnatöku.
